GALIZA POLA PAZ
A OTAN, os bombardeos e a nosa soberanía: por que dicimos abonda?
Nestes últimos días, o mundo volveu virar os ollos cara Oriente Medio: primeiro Israel atacou Irán e, pouco despois, Estados Unidos —principal potencia da OTAN— sumouse á escalada militar sen consultar nin informar previamente aos demais países aliados. A decisión unilateral do presidente estadounidense, asumida sen debate nin consenso, deixou en evidencia o papel residual doutros membros da Alianza Atlántica, convertidos nun apéndice mudo dun imperio que actúa ao seu antollo.
Como se isto fose pouco, apenas dous días despois deste ataque, Washington convocou unha cume da OTAN para esixir aos estados membros un novo esforzo: investir un 5% do seu PIB en armamento, unha cifra astronómica que só beneficia á industria bélica e ás oligarquías que viven do conflito. A única voz que se mantivo firme, poñendo unha liña vermella, foi a do presidente do Goberno español, que defendeu —non sen críticas— a necesidade de priorizar os servizos públicos fronte ao negocio da guerra.
Porque en España —e tamén en Galicia— sabemos ben que significa ter dereitos sociais: sanidade pública, educación accesible, pensións e servizos que non existen nese modelo ultracapitalista norteamericano onde quen non ten cartos non pode estudar nin curarse. Aquí non queremos converter os hospitais en empresas nin entregar a nosa soberanía á lóxica militar dunha potencia que decide bombardear sen pedir permiso nin dar explicacións.
Ademais, non esquecemos quen é Israel: un estado que perpetra crimes contra a poboación palestina mentres acusa, sen rubor, ao noso presidente de “estar no lado equivocado da historia” simplemente por reclamar xustiza. Pois si, aquí somos moitos e moitas os que dicimos abonda: queremos saír da OTAN, deixar de apoiar un estado xenocida e defender que Galicia e España son países soberanos que non poden nin deben ser peóns no taboleiro doutros.
É hora de dicilo alto e claro: non á guerra, non á OTAN, si aos dereitos sociais e á paz.
Máis breves
Lume nas Barrioncas
O pasado xoves 26 tiveron que vir apagar un incendio que se iniciou na zona das Barrioncas e no camiño do Formado. A rápida intervención dos bombeiros conseguiu deter o lume evitando unha catastrofe maior.
A calor destes días fixo secar todo e o risco de incendio é elevadisimo.
Dificil é crer que o incendio se ocasionou accidentalmente pero tal vez. Non puiden falar cos bombeiros desprazados para saber si atoparan algunha evidencia de intencionalidade.
--------------------------------------
Os tapiais de Piño
Nestes días tivemos a visita dunha rapaza, Branca que veu a investigar sobre as numerosas construccións que hai na nosa parroquia con esta técnica, realizando unha visita pola mesma en compañía de membros da asociación veciñal e veciños de idade que lembran ás persoas que acomenteron algunhas das construcións ata case os anos 60 onde se testemuña unha dos últimos tapiais realizados.
----------------------------------------
Flores
O bonito que está Piño, con tantas flores de ortensias por todos lados.
Moi pronto, unhas fotiños.
Novas Breves
Bando da Alcadía
Un bando do concello anuncia que o cobro da tarifa da auga e do lixo farase quadrismestral e non semestral como se viña facendo. Nos vindeiros días pasarase o recibo correspondente a xaneiro, febreiro, marzo e abril de 2025.
A ordenanza fiscal reguladora foi modificada pola Deputación de Lugo e publicada no Boletín Oficial da Provincia con data 09 de maio de 2025.
--------------------------------------
Xantar de Confraternidade
Este pasado sábado 14 de xuño foron numerosos os veciños que se xuntaron para desfrutar dun xantar e rematar o remanente de comida que sobrara das festas da Santa Bárbara.
Podes ollar no lateral algunha imaxe pública da misa de procesión da festa da Santa Bárbara 2025.
----------------------------------------
Obras particulares
Nas últimas semanas dous veciños acondicionaron pozos tradicionais da súa propiedade.
Os dous pozos, un da moradella e outro da Cova foron restaurados polos seus respectivos donos.O da Moradella limpouse a man e tapouse cunha placa de cemento. O da Cova tamén se acondicionou cuns tubos e arcos grandes de formigón.
Este tipo de actuacións son de grande valor, pois contribúen á preservación do patrimonio rural e garanten a súa funcionalidade durante moitas décadas, en beneficio das futuras xeracións.
Conservación de estradas
No mes de abril de 2011 aplicouse formigón en quente na estrada principal da nosa parroquia.
Como se aprecia na fotografía lateral, catorce anos despois a vía amosa numerosos baches que reflicten o abandono do mantemento continuo que debería realizarse.
Durante este tempo, a auga atravesa de beira a beira o firme e, a pesar de que o ano pasado acondicionáronse algúns tramos de cunetas, en moitos outros continúa desbordada.
A carencia de mantemento, como un recheo de alquitrán nas fendas que se foron abrindo agravaron o deterioro da vía, ou coma o desbroce tardío das cunetas pon en risco ano tras ano a seguridade viaria: moitos condutores circulan achegados ao centro da calzada, poñendo en perigo aos que van en sentido contrario, mentres que outros arrímanse en exceso e, ao non advertir a profundidade da cuneta, sofren saídas de vía, como tamén podes ver na foto lateral.
É ben sabido que as administracións atenden con maior consideración as peticións que reflicten o sentir colectivo dunha comunidade. Por iso, queremos lembrarvos que unha instancia asinada pola Asociación Veciñal de Piño –representando a todos e todas os nosos veciños e veciñas– terá moito máis peso ante a Deputación Provincial que unha solicitude illada feita por unha única persoa.
Cando a Deputación recibe un documento asinado en nome da Asociación, percibe que existe un respaldo comunitario e unha vontade de consenso que avala as propostas presentadas. Así, a nosa voz fíxase con maior atención, incrementando as posibilidades de que as peticións de mantemento, melloras de infraestrutura ou calquera outra demanda teñan unha resposta áxil e eficaz.
Animámosvos a que poñades en coñecemento a vosa inquietude achegando novas ideas e necesidades á Asociación Veciñal. Canto máis xuntos esteamos, máis forte será a nosa reclamación e máis rápido poderemos conseguir que a Deputación actúe en prol do benestar de todos.
