Webpino unha web viva

Xusto o día antes do bautizo, o niño das cegoñas da Avda. de Bóveda veuse abaixo, coas crías incluídas. Grazas a unha chamada rápida dun veciño, os servizos de protección, conseguiron chegar a tempo para levar as pequenas cegoñas á recuperación, e polo visto en canto se recuperen é probable que as devolvan ao lugar. As proxenitoras estiveron moi inquedas, pero agora están volvendo a refacer o niño.

Xa se dera aviso ao Concello hai máis dun ano de que o niño adquirira moito volume e de que estaba a piques de caer.

Caeo pola noite dentro da finca dunha veciña e non houbo que lamentar máis danos.

Este sábado, 3 de maio, na igrexa de Santa María de Piño, ás 13:00 horas, celebrarase o bautismo de catro nen@s. O acto será aberto a toda a parroquia.

Mael, Aine, Aldara e Claudia recibirán o sacramento do bautismo na fe cristiá. Estes cativiños, residen en Madrid, pero manteñen fondas raíces na nosa terra, xa que son descendentes da casa de Peruchela.

A última nena bautizada na parroquia foi Sofía, filla de Raquel e Iván de Centeais, o 14 de outubro de 2023. Antes dela, pasaran xa moitos anos sen que se celebrase un bautizo na nosa igrexa, tanto que non conservamos memoria clara de quen puido ser o anterior. Podedes ver aquela entrada nesta ligazón: Outubro 2023 – Bautizo de Sofía.

Este novo bautismo terá lugar nun momento particularmente simbólico: a escasos días do funeral do Papa Francisco, e cando a Igrexa Católica aínda non conta cun novo pontífice elixido. Así, nun tempo de transición para a Igrexa universal, a nosa pequena comunidade será escenario dunha cerimonia chea de esperanza, vida e continuidade na fe.

Convidamos a todas as persoas da parroquia a participar neste acto tan significativo para a familia Peruchela e para a nosa comunidade.

Rematou o mes de abril cunha mellora importante no cemiterio parroquial: durante os dous últimos días acometeuse a pintura da fachada exterior.

Esta obra foi posible grazas ás achegas voluntarias das persoas que colaboran co fondo para o mantemento e arranxo do cemiterio.

Conservar e mellorar os lugares que forman parte da nosa memoria e identidade parroquial fai que sexamos unha comunidade máis unida, agradecida co pasado e comprometida co futuro.

Tipoloxía: Pía bautismal monolítica de granito
Localización: Á entrada da igrexa, á man dereita
Época estimada: Séculos XII–XIV (alta ou plena Idade Media)
Estado de conservación: Bo, con desgaste nos bordos por uso prolongado

📜 Descrición:

A pía bautismal da igrexa de Santa María de Piño é unha peza monolítica labrada en granito, de forma semiesférica e perfil robusto, propia da tradición románica rural galega. A súa sinxeleza formal, grosor das paredes e ausencia de decoración ornamental sitúana probablemente entre os séculos XII e XIV.

Esta pía foi empregada ao longo de séculos para administrar o sacramento do Bautismo, un dos momentos fundamentais da vida cristiá. O seu deseño responde ao modelo de pías para aspersión ou inmersión parcial, adaptadas á liturxia medieval e posteriores.

Actualmente está situada á entrada do templo, á man dereita, ocupando o lugar simbólico que tradicionalmente se reservaba para este elemento: xunto á porta, representando o acceso á vida cristiá.

A súa conservación e visibilización contribúen a manter viva a memoria litúrxica e cultural da parroquia, sendo testemuña material da fe e identidade da comunidade ao longo dos séculos.